Mánudagurinn 20. nóvember 2017

Vinaliðar

Vinaliðaverkefnið er að hefja göngu sína í skólanum okkar. Vinaliðaverkefnið er norskt að uppruna og hefur verið framkvæmt í 776 grunnskólum í Noregi sl. 3 ár. Vinaliðaverkefnið gengur út á að hvetja nemendur til meiri þátttöku í leikjum og afþreyingu í frímínútum og að skapa betri skólaanda. Við byrjum með 4. -7. bekk en stefnum einnig á að nota verkefnið með 8.-10. bekk.
mynd_VL
smelltu á myndina

Aðalmarkmiðið með þessu verkefni er að bjóða öllum nemendum skólans fjölbreyttara úrval afþreyingar í frímínútum, þannig að bæði yngri og eldri nemendur skólans finni eitthvað við sitt hæfi. Markmið okkar er að allir nemendur skólans hlakki til að mæta í skólann sinn, alla daga.

Hólabrekkuskóli er fyrsti skólinn í Reykjavík sem tekur vinaliðaverkefnið upp. Við erum mjög stolt af því og spennt að sjá það í framkvæmd. Árskóli á Sauðárkróki var fyrsti skólinn til að byrja með verkefnið á Íslandi og njótum við handleiðslu og stuðning þeirra á meðan við stígum fyrstu skrefin.

 

Einelti

Skólalóðin og frímínúturnar eru ,því miður, samkvæmt eineltisrannsóknum helsti vettvangur fyrir einelti. Vinaliðaverkefnið er ekki eineltisáætlun heldur stuðningsverkefni við eineltisáætlun skólans og er hugmyndafræðin sú að þar sem boðið er upp á skipulagt starf, fái gerendur eineltis aðra hluti til að hugsa um. Aðgerðarleysi er nefnilega oft rótin að slæmum hlutum.

Val/vinnuframlag

Nemendur í 4. til 7. bekk hafa valið einstaklinga úr bekkjunum sem fá hlutverk Vinaliða nú fram á vor. Vinaliðar hafa umsjón með að koma leikjum og afþreyingu í gang og ganga frá eftir leikina. Það sem eftir lifir þessa skólaárs munu vinaliðar starfa í fyrstu frímínútum.

Næsta skólaár verða vinaliðar valdir að hausti og svo aftur á nýju ári. Þá verður starfið í fært í aðrar frímínútur lengri en þær sem við notum nú í vetur.

Vinaliðar vinna tvo daga í viku, mánudag og miðvikudag eða þriðjudag og fimmtudag. Þeir mæta einnig á fundi þar sem starfið í frímínútum er skipulagt og vangaveltur sem því tengjast eru ræddar. Það er ekkert sem segir að Vinaliði geti ekki verið valinn aftur seinna, hópurinn tilnefnir þá nemendur sem honum finnst passa í starfið hverju sinni.

Við val á Vinaliðum voru nemendur skólans sérstaklega beðnir um að tilnefna einstaklinga sem þeim finnast vera vingjarnlegir og sýni öðrum nemendum virðingu.

Hreyfing og skemmtun á venjulegum skóladegi

Mikilvægt er fyrir börn og unglinga að fá fjölbreytta hreyfingu og skemmtun og er það nauðsynlegur hluti af þroska þeirra, enda hafa rannsóknir sýnt að það er samhengi milli hreyfingar og námsgetu. Við viljum því að framboð af hverskonar hreyfileikjum og annarri afþreyingu í frímínútunum sé fjölbreytt og skipulagt þannig að sem flestir finni eitthvað við sitt hæfi. Vinaliðaverkefnið er okkar leið til að mæta þessu, en í verkefninu eru settir upp leikir og afþreying af nemendum og á þeirra forsendum. Nemendur skólans hafa svo að sjálfsögðu val um hvort og þá hvaða leikjum þeir taka þátt í.

Vinaliðakort

Vinaliðar fá afhent vinaliðakort. Það er enn verið að vinna að því að fá afslátt eða frían aðganga fyrir vinaliða að ýmsum viðburðum, söfnum og fleira. Þar sem við erum fyrsti skólinn í Reykjavík er þetta enn á byrjunarstigi.

Leikjanámskeið

Við upphaf starfs Vinaliðans er haldið leikjanámskeið fyrir alla Vinaliða í Hólabrekkuskóla. Á námskeiðinu er farið í leiki úr handbókinni „Leikir í frímínútunum" sem er gefin út af Vinaliðaverkefninu og Vinaliðunum kennt að koma leikjunum í gang og hvernig hægt er að hvetja aðra til að taka þátt. Að auki sitja Vinaliðarnir á stuttum fyrirlestri um hlutverk Vinaliðans.

Umsjón/upplýsingar

Í Hólabrekkuskóla er Ragnheiður Sveinbjörnsdóttir umsjónarmaður verkefnisins. Netfang hennar er This e-mail address is being protected from spambots. You need JavaScript enabled to view it.

Með kærri kveðju

Skólastjóri

Vinaliði á að:

- setja upp, taka þátt í og aðstoða við afþreyingu í frímínútunum

- sýna yngri nemendum sérstaka athygli sem og þeim sem eru einir í frímínútunum

- láta vita af því ef hann heldur að nemendum í skólanum leiðist, séu einmana eða

ef hann verður vitni að einelti og útilokun eða öðru sem getur valdið vanlíðan

nemenda

- fá dagsnámskeið í leikjum og ráðleggingar um hvernig hægt er að hvetja aðra í

leik

- fá stuðning og leiðsögn frá umsjónarmanni Vinaliðaverkefnisins í skólanum

Prenta | Netfang